लालझाडी ३ । कञ्चनपुरको बेलडाँडी गाउँपालिका-२ स्थित क्याम्प टोलमा जंगली हात्तीले आतंक मच्चाउँदै एक घर भत्काइदिएको छ भने स्थानीय किसानले लगाएको धान तथा तिलबालीमा समेत ठूलो क्षति पु¥याएको छ ।
मंगलबार राति करिब २ बजेतिर बस्तीमा प्रवेश गरेको जंगली हात्तीले स्थानीय किसानको खेतमा पसेर धान खानुका साथै तिललगायतका बाली नष्ट गरेको स्थानीयले बताएका छन् । हात्तीले राति करिब ३ बजेतिर क्याम्प टोल निवासी गीता गुर्धामी बस्दै आएको घरमा आक्रमण गरी भत्काइदिएको हो ।
दुई साना बच्चासहित घरमा एक्लै रहेकी गुर्धामीले हात्तीले घर भत्काउन थालेपछि ज्यान जोगाउन बच्चासहित भागेर सुरक्षित स्थानमा पुग्न सफल भएको बताइएको छ । समयमै भाग्न सफल भएकाले मानवीय क्षति हुनबाट जोगिएको स्थानीयको भनाइ छ ।
बस्तीमा प्रवेश गरेको हात्तीलाई स्थानीयवासी तथा नेपाली सेना र रेञ्जर पोष्टका कर्मचारीहरूले संयुक्त रूपमा भगाउने प्रयास गरेका थिए । करिब चार घण्टाको प्रयासपछि मात्रै हात्तीलाई जंगलतर्फ फर्काउन सफल भएको स्थानीयले बताएका छन् ।
जंगल किनार र निकुञ्ज आसपासका बस्तीका नागरिकले भने वर्षौंदेखि जंगली जनावरको आतंक खेप्दै आएको गुनासो गरेका छन् । जंगली हात्ती, गैंडा, बाघ, चितल, बँदेललगायतका वन्यजन्तुले बारम्बार खेतीबाली नष्ट गर्ने, गोठमा रहेका गाइ बस्तु, बाख्रा खाएर घरमा क्षति पु¥याउने र स्थानीयको ज्यानसमेत जोखिममा पर्ने अवस्था रहे पनि समस्या समाधानका लागि प्रभावकारी पहल हुन नसकेको उनीहरूको आरोप छ ।
स्थानीयका अनुसार, मध्यवर्ती क्षेत्रका जनताको संरक्षण, सुविधा र मानव-वन्यजन्तु द्वन्द्व न्यूनीकरणका लागि गठन गरिएका सम्बन्धित निकाय तथा उपभोक्ता समितिहरूले प्रभावित नागरिकको आवाज पर्याप्त रूपमा उठाउन सकेका छैनन् । ऐलानी तथा भोगचलनमा रहेको जग्गामा गरिएको खेतीमा जंगली जनावरले क्षति पु¥याउँदा पीडित किसानले राहत र क्षतिपूर्तिसमेत सहज रूपमा पाउन नसकेको गुनासो उनीहरूको छ ।
पीडित किसानहरूले केवल पदमा बस्ने र सुविधा लिनेभन्दा पनि निकुञ्ज किनारमा दैनिक त्रासमा जीवन बिताइरहेका नागरिकको पीडा बुझेर ठोस काम गर्नुपर्ने बताएका छन्।
“बस्तीभित्र सुरक्षित र सुविधासम्पन्न जीवन बिताउने उभोक्ता पदाधिकारीहरूले जंगल किनारमा खुकुरीको धारमा बसेझैँ त्रासपूर्ण जीवन बिताइरहेका हामी किसानको पीडा कहाँ बुझ्छन् र ?” एक स्थानीयले आक्रोश व्यक्त गर्दै भने, “हाम्रो खेती सखाप हुन्छ, घर भत्किन्छ, परिवारको ज्यान जोखिममा पर्छ । तर क्षतिको मूल्यांकन, राहत र दीर्घकालीन समाधानका लागि कसैले गम्भीर चासो दिएको देखिँदैन ।”
स्थानीयले मानव-वन्यजन्तु द्वन्द्व न्यूनीकरणका लागि तत्काल प्रभावकारी योजना सञ्चालन गर्न, जंगल किनारका बस्तीमा सुरक्षा व्यवस्था बलियो बनाउन, पीडित किसानलाई क्षतिको उचित राहत तथा क्षतिपूर्ति उपलब्ध गराउन र सम्बन्धित मध्यवर्ती क्षेत्र व्यवस्थापन निकायलाई जनताप्रति थप जिम्मेवार बनाउन माग गरेका छन्।
