काठमाडौं । प्रधानमन्त्रि बालेन्द्र साहले श्रम संस्कृति पार्टीका अध्यक्ष हर्क साम्पाङलाई लक्षित गर्दै संयमता, सहकार्य र सभ्य संवादको सन्देश दिएका छन् ।
सामाजिक सञ्जालमार्फत प्रतिक्रिया जनाउँदै बालेनले समाज परिवर्तनका लागि हर्क साम्पाङले खेलेको भूमिकाको प्रशंसा गर्दै अबको राजनीति आरोप–प्रत्यारोपभन्दा माथि उठ्नुपर्ने बताएका हुन् ।
उनले देश निर्माणका लागि आपसी सम्मान, सकारात्मक सोच र सहकार्य आवश्यक रहेको उल्लेख गर्दै असहमति भए पनि त्यसको समाधान “सभ्य संवाद र विवेकपूर्ण बहस” बाट खोजिनुपर्ने धारणा राखेका छन् ।
“राष्ट्र र जनताको हितलाई केन्द्रमा राखेर अघि बढ्नुपर्छ,” बालेनको सन्देशमा उल्लेख छ ।
पछिल्लो समय हर्क साम्पाङले सुकुम्वासी बस्तीमा डोजर चलाइएको विषयदेखि अध्यादेश, बजेट र सरकारको कार्यशैलीमाथि लगातार आक्रामक अभिव्यक्ति दिँदै आएका छन् । उनले सरकार “दुर्घटनातिर कुदिरहेको” आरोपसमेत लगाएका थिए ।
त्यसैबीच आएको बालेनको यो सन्देशलाई राजनीतिक वृत्तमा “तनाव कम गर्ने प्रयास” का रूपमा हेरिएको छ ।
बालेनले हर्कको ऊर्जा, समर्पण र जनतामाझको प्रभावलाई सकारात्मक रूपमा उपयोग गर्न आग्रह गर्दै देश निर्माणमा अझ प्रभावकारी भूमिका खेल्ने अपेक्षा पनि व्यक्त गरेका छन् ।
