कञ्चनपुर । शिक्षा विकास तथा समन्वय इकाइ कञ्चनपुरले शैक्षिक सत्र २०८१ का लागि कक्षा १० मा भर्ना भएका विद्यार्थीहरूको विवरण (रजिस्ट्रेशन फाराम) समयमै नबुझाएको भन्दै जिल्लाका केही माध्यमिक विद्यालयहरूलाई सचेत गराएको छ।
इकाइले सार्वजनिक गरेको सूचनाअनुसार कक्षा १० मा भर्ना भएका एसईई परीक्षा दिने विद्यार्थीहरूको रजिस्ट्रेशन फाराम अनिवार्य रूपमा यस इकाइमा बुझाउनुपर्ने व्यवस्था भए पनि केही विद्यालयहरूले पटक–पटक लिखित तथा मौखिक जानकारी गराउँदा समेत तोकिएको समयसीमाभित्र विवरण पेश नगरेको पाइएको छ।
सूचनामा उल्लेख गरिएअनुसार २०८१ मंसिर महिनामा समेत सम्बन्धित विद्यालयहरूलाई जानकारी गराइए पनि हालसम्म फाराम नबुझाएको पाइएकाले अब त्यसबाट पर्न जाने असर–परिणामको सम्पूर्ण जिम्मेवारी सम्बन्धित विद्यालयका प्रधानाध्यापक स्वयं हुने स्पष्ट गरिएको छ।
शिक्षा विकास तथा समन्वय इकाइ कञ्चनपुरका इकाइ प्रमुख लक्ष्मण गिरीद्वारा हस्ताक्षरित सूचनामा विद्यालय प्रशासनलाई यथाशीघ्र विद्यार्थी विवरण बुझाउन आग्रह गरिएको छ।
इकाइले सार्वजनिक गरेको सूचीअनुसार विवरण नबुझाएका विद्यालयहरूमा वैजनाथ माध्यमिक विद्यालय महेन्द्रनगर, शान्ति निकेतन माध्यमिक विद्यालय ऐठपुर, सिद्धार्थ वैजनाथ माध्यमिक विद्यालय बगुन, सिद्धार्थ माध्यमिक विद्यालय महेन्द्रनगर, राष्ट्रिय माध्यमिक विद्यालय अमबस्ती, कालिका माध्यमिक विद्यालय असैना, शान इन्टरनेशनल पब्लिक स्कुल ऐठपुर,सार्क एजुकेशन फाउण्डेसण महेन्द्रनगर लगायतका १५ बिद्यालय रहेका छन ।
