हमासले इसराइललाई थप चार जना बन्धकको शव हस्तान्तरण गरेको छ।
बिहिबार बिहान हमासले रेड क्रसमार्फत इसराइललाई हस्तान्तरण गरेको हो। यो पटक हमासले हस्तान्तरण गरेको चारै शव पुरूषको रहेको अन्तर्राष्ट्रिय सञ्चारमाध्यमहरूले जनाएका छन्।
८५ वर्षका श्लोमो मन्त्जुर, ६९ वर्षका इज्हक इलगारत तथा ४९/४९ वर्षका त्साची इदान र ओहाद याहालोमी छन्।
शव इसराइल पुर्याइएको र फरेन्सिक चेकजाँच भइरहेको टाइम्स अफ इसराइलले जनाएको छ।
हमासले युद्धविराम सम्झौता कार्यान्वयन नगरेको भनेर इसराइलले गत साता बन्धकको बदलामा कैदीहरू छाडेन।
अघिल्लो साता हमासले ६ जना बन्धक रिहा गरेको थियो। त्यसको बदलामा इसराइलले ६०२ जना प्यालेस्टिनी कैदी छाड्ने भनिएको थियो। तर पटकपटक युद्धविराम सम्झौता उल्लंघन गरेको आरोप लगाएर इसराइलले त्यस दिन बन्दी रिहा गरेको थिएन।
बिहीबार भने इसराइलले ६२० जना कैदी छाडेको समाचार संस्था रोयटर्सले जनाएको छ। तीमध्ये १५१ जना आजिवन कैद सजाय तोकिएका व्यक्तिहरू रहेको भनिएको छ।
गजामा बन्धकमध्ये ३० जना मारिएको इसराइली अधिकारीहरूको आकलन छ। ती मध्ये केही हमासले र केही इसराइल आक्रमणमा मारिएका थिए।
माघ ५ गतेदेखि सुरू भएको युद्धविरामको पहिलो चरणको समयावधि सकिनै लागेको छ। तर मध्यस्तकर्ताहरूले दोस्रो चरणको युद्धविरामका लागि छलफल अगाडि नबढाएको भनेर अन्तर्राष्ट्रिय सञ्चारमाध्यमहरूले जनाएका छन्।
हमासले यसअघि चार जनाको शव हस्तान्तरण गरेको थियो। त्यतिबेला परीक्षण गर्दा चार मध्ये एउटा शव पहिचान नखुलेको व्यक्तिको रहेको र बन्धकको नरहेको पाएको थियो।
इसराइलको दबाबपछि हमासले गत शुक्रबार बन्धकको शव हस्तान्तरण गरेको थियो।
