कञ्चनपुरको लालझाडी गाउँपालिका वडा नम्बर २, कञ्जमा रहेको जनउत्थान सामुदायिक लघुवित्त वित्तीय संस्था लिमिटेड शाखा कार्यालयले आफ्नी एक दिवंगत सदस्यको परिवारलाई ठूलो आर्थिक राहत प्रदान गरेको छ। बेलौरी नगरपालिका वडा नम्बर ४, बुटावारी ठेगाना भई संस्थाको निंगलासैनी बैंकिंग समुदायमा आबद्ध सदस्य शुसिला सिंह शाही (सदस्यता नम्बर: ३७.००७८.०१.१) को गत २०८३ साल वैशाख २१ गते असामयिक निधन भएको थियो।
दिवंगत शाहीले २०८० साल पुस २० गते संस्थाबाट १ लाख ५ हजार रुपैयाँ कर्जा लिनुभएको थियो। उहाँको निधनपछि तिर्न बाँकी रहेको १ लाख १ हजार ७ सय १ रुपैयाँ सावाँ और ४० हजार ७ सय १५ रुपैयाँ ब्याज संस्थाको ग्राहक संरक्षण कोषबाट पूर्ण रूपमा मिनाहा गरिएको छ।
यसै गरी, संस्थाले मृतकको परिवारलाई किरिया खर्च बापत थप ३ हजार रुपैयाँ समेत उपलब्ध गराएको छ। कर्जा मिनाहा र किरिया खर्चको हिसाब मिलान गरी कुल १ लाख ४५ हजार ४ सय १६ रुपैयाँको चेक रकम गत २०८३ भदौ १६ गते एक कार्यक्रमका बीच मृतकका श्रीमान भुपेन्द्र शाहीलाई हस्तान्तरण गरिएको छ।
उक्त राहत तथा चेक रकम पीडित परिवारलाई संस्थाका शाखा सञ्चालन अधिकृत नरेश कुमार बोहराले हस्तान्तरण गर्नुभएको हो। चेक हस्तान्तरण गर्दै शाखा अधिकृत बोहराले सदस्यको दुःखद् निधनप्रति गहिरो समवेदना प्रकट गर्नुभयो। साथै, संकटको घडीमा संस्थाको ग्राहक संरक्षण कोषमार्फत प्रदान गरिने यस्तो राहतले ग्रामीण क्षेत्रका विपन्न परिवारलाई ठूलो संस्थागत सहारा मिल्ने विश्वास व्यक्त गर्नुभयो।
