मधेश प्रदेशकै ठूलो सरकारी स्वास्थ्य संस्था नारायणी अस्पताल का ४० भन्दा बढी चिकित्सकले सामूहिक राजीनामा दिएका छन्। चिकित्सकमाथि भएको कुटपिट, अस्पतालमा भएको तोडफोड तथा त्यसपछिको प्रशासनिक व्यवहारप्रति असन्तुष्टि जनाउँदै उनीहरूले मेडिकल सुपरिन्टेन्डेन्ट डा.चित्तरञ्जन साहसमक्ष राजीनामा बुझाएका हुन्।
चिकित्सकहरूले प्रमुख जिल्ला अधिकारी (सीडीओ) र जिल्ला प्रहरी प्रमुख (एसपी) ले वार्ताका क्रममा दुर्व्यवहार गरेको आरोप लगाउँदै दुवै अधिकारीलाई हटाउनुपर्ने माग गरेका छन्। अस्पतालका करिब ७० चिकित्सकमध्ये ४० भन्दा बढीले राजीनामा बुझाइसकेका छन् भने अन्य चिकित्सकको हस्ताक्षर संकलन भइरहेको जनाइएको छ।
अस्पतालका डा.उदयनारायण सिंहका अनुसार स्वास्थ्य मन्त्रालयको आग्रहपछि चिकित्सकहरू आकस्मिक सेवा सञ्चालन गर्न सहमत भएका थिए। आक्रमणमा संलग्नमाथि कारबाही गर्ने आश्वासनपछि जिल्ला प्रशासन कार्यालयमा भएको छलफल भने तनावपूर्ण बनेको थियो।
चिकित्सकहरूको आरोपअनुसार वार्ताका क्रममा नेपाल चिकित्सक संघका प्रतिनिधिले दोषीमाथि कारबाही नभए प्रशासनिक नेतृत्वको राजीनामा माग्न सकिने धारणा राखेपछि विवाद चर्किएको थियो। त्यसपछि सीडीओ र एसपीले अपशब्द प्रयोग गर्दै प्रहरी परिचालन गरी चिकित्सकहरूलाई नियन्त्रणमा लिएको तथा मोबाइलसमेत खोसेर करिब एक घण्टा नियन्त्रणमा राखेको उनीहरूको दाबी छ।
सुरक्षित वातावरणमा काम गर्न नसकिने निष्कर्षसहित चिकित्सकहरूले सामूहिक राजीनामा दिएको बताएका छन्।
गत साउन ९ गते डा. प्रमोद राममाथि भएको कुटपिट तथा अस्पतालमा भएको तोडफोडपछि आन्दोलन सुरु भएको हो। घाइते डा.रामको काठमाडौंस्थित राष्ट्रिय ट्रमा सेन्टरमा उपचार भइरहेको छ।
यता, नेपाल चिकित्सक संघ ले पनि घटनाको विरोध गर्दै देशभर आकस्मिक सेवाबाहेकका स्वास्थ्य सेवा बन्द गर्ने घोषणा गरिसकेको छ। चिकित्सकहरूले दोषीलाई तत्काल पक्राउ गरी कानुनी कारबाही गर्न तथा सीडीओ र एसपीलाई हटाउनुपर्ने माग पूरा नभएसम्म काममा नफर्किने अडान लिएका छन्।
