लालझाडी कंचनपुर ,कञ्चनपुरको बेलौरी नगरपालिकामा विद्यालयको बसले मोटरसाइकललाई ठक्कर दिँदा एक जना युवा गम्भीर घाइते भएका छन्। बेलौरी नगरपालिका वडा नम्बर ३ खिरियास्थित भित्री सडक खण्डमा आज दिउँसो गुडिरहेको विज्डम एकेडेमीको बस र मोटरसाइकल एकआपसमा ठोक्किँदा सो दुर्घटना भएको हो।
जिल्ला प्रहरी कार्यालय कञ्चनपुरबाट प्राप्त आधिकारिक सूचना अनुसार आज दिउँसो साढे १ बजेको समयमा खिरियाबाट फटैयातर्फ जाँदै गरेको सु.प.प्र. ०१-००१ क २६२७ नम्बरको विज्डम एकेडेमीको बसले विपरीत दिशाबाट आउँदै गरेको सु.प.प्र. ०१-०११ प ७०७३ नम्बरको मोटरसाइकललाई ठक्कर दिएको थियो। दुर्घटनामा परि मोटरसाइकल चालक बेलौरी नगरपालिका वडा नम्बर ३ पडाउ निवासी २९ वर्षीय महेश राना गम्भीर घाइते भएका छन्। विद्यालय बसका चालक बेलौरी नगरपालिका वडा नम्बर ४ बेलौरी बजार बस्ने ४६ वर्षीय विज्ञान महर्जन रहेका छन्।
घटनालगत्तै स्थानीय बासिन्दाले दिउँसो पौने २ बजेको समयमा प्रहरीलाई खबर गरेका थिए। जानकारी पाउनासाथ इलाका प्रहरी कार्यालय बेलौरीका प्रहरी निरीक्षक कमल प्रसाद चौधरीको कमाण्डमा सात जनाको प्रहरी टोली तत्काल घटनास्थलतर्फ परिचालन भएको थियो। दिउँसो पौने २ बजे नै घटनास्थल पुगेको प्रहरी टोलीले स्थानीयबासीको सक्रियतामा घाइते रानाको उद्धार गरी तत्काल उपचारका लागि धनगढीस्थित निसर्ग अस्पताल पठाएको छ। अस्पताल स्रोतका अनुसार घाइते रानाको टाउको र शरीरका विभिन्न भागमा गम्भीर चोट लागेकाले अवस्था चिन्ताजनक रहेको छ।
प्रहरीले दुर्घटनामा संलग्न विद्यालयको बस र चालक महर्जनलाई नियन्त्रणमा लिएर अनुसन्धान सुरु गरिसकेको छ भने दुर्घटनाग्रस्त मोटरसाइकल अझै घटनास्थलमै रहेको छ।
